قال حجب المواقع الاباحية قال

ماشاء الله .. لأ بجد ما شاء الله تمخض الجبل فولد برصا واحد غلبان في مخه رفع قضية علشان الحكومة تقوم بحجب المواقع الاباحية على الانترنت..جميل جدا قامت المحكمة حكمت بأن تقوم الحكومة بحجب هذا الانحلال و المسخرة الجميل بقى .. ان في ناس ما تجيش الا في الهايفة و تتصدر يعني البلد مليانة خراب من أعلى نقطة لأسفل نقطة بس في واحد مضايق قوي من المواقع اللي مش ولا بد .. يعني مصر هاتبقى زي السعودية .. ماشاء الله طبعا البعض هايطير بالخبر ده و هايقولوا نصر للاسلام .. و لكن الموضوع باختصار مقدمة من اجل تقييد الحريات العامة يعني الموقع اللي مش هايعجب الحكومة ..هايجبوه بحجة احتواؤه على مواد اباحية و ازدراء أديان و الطبخة اياها طبعا الحكومة الغلبانة و الغلبان اللي رفع القضية متخيليلن ان الناس هاتغلب يعني انا جاي داخل موقع من اياهم لقيته مقفول .. يبقى خلاص بقى .. هاستغفر و أصلي ركعتين و خلصنا و كأن مفيش بروكسيهات .. و ممكن انزل أفلام كاملة عن طريق تورنت و غيره .. و مفيش أنفاق انترنت و غيره و غيره المصريين اكيد هايستعينوا بخبرات اخوانهم من الشعوب اللي عندها كبت زي السعوديين و غيرهم طبعا في ناس هاتعمل فلوس على حس الموضوع ده و يبيعوا سيديهات و خلافه و بعدين انا مش فاهم يعني .. هي فين الرقابة على النفس؟ و فين جاهد النفس و الحاجات دي .. و لا لازم المنع و الحجب علشان الناس تبعد عن الهلس ده؟ الحكومة مش فارق معاها الشعب كله يتفرج على أفلام و لا صور و لا غيره ان شاء الله يولعوا.. المهم يبعدوا عن الكلام الكبير يعني اي مجموعة احتجاجية على الفيس بوك ممكن يحجبوها و بالتالي و لا حد يقول 7 ابريل بقى و لا 10 رمضان .. و الحجة بسيطة بقى .. أصل المجموعة كان فيها كام واحدة لابسين مايوهات اللي جاي شكله مش كويس خالص

ملحوظة: محدش الله يخليكم يقولي يعني انت مبسوط بالمواقع الاباحية و الانحلال اللي مالي البلد و الكلام ده .. علشان السعودية جنبنا اهه و بتحصل فيها أقذر الموبقات

 

.. تحياتي

Advertisements

15 تعليق

  1. طبعا المغزى هو حجب اى حاجه مش على مزاج الحكومة الموقرة بتاعتنا والحجة انها اباحية

  2. بجد ربنا يستر من اللي جاي .. أصل أنا حاسس إن قبل أي تغيير لازم نوصل للقاع .. المشكلة إن لحنا لسه ما وصلناش للقاع ده و بالتالي اللي جاي غالبا أسوأ .. شكرا لمرورك

  3. لا يا عزيزي

    بهذا المنطق الذي تدافع به، يجب إباحة المخدرات والدعارة، باعتبار أن القضاء عليهما مستحيل.
    سيظل هناك مخالفات لكل قانون، وتجاوزات لكل نظام. ولكن ينبغي أن يظل الأصل هو الصواب، والحماية ومنع الخطأ من الانتشار.
    أما مسألة حجب المواقع لأسباب سياسية، فالحكومة لا تحتاج إلى ذريعة من القضاء لحجبها.

    تحياتي

  4. طيب سؤال بسيط .. انت الراجل اللي بيدخل مواقع اباحية تاعبك في ايه؟
    مضايقك في حاجة ؟ مش المبدأ الأصيل أنه لا ضرر و لا ضرار ؟ فمباذا يضرك هذا الشخص المريض؟ يعني ماذا سيعود على المجتمع عند حجب المواقع الاباحية؟
    عندنا المجتمع السعودي .. تقدر تقولي بماذا عادت عليه هذه الممارسات الديكتاتورية ..؟؟
    و بعدين انت عايز تفهمني ان أعداد من سيخالفون قانون اباحية الانترنت سيصل عددهم الى من يتعاطون مخدرات و يمارسون الدعاة في مصر؟ انت ما بتشوفش احصائيات انترنت و لا ايه يا فندم ؟
    نقطة أخرى .. الحكومة دائما تحتاج الى غطاء يا سيدي الفاضل .. و الا فما فائدة تعديل الدستور مثلا ؟!! دي كلها حجج فاضية .. بس خللي بالك الحكومة برده مبسوطة بمثل هذا القرار .. و ابقى قابلني لو طبقوه و لكنه ورقة في ديهم .. منها يبسطوا الجماعات الاسلامية اللي صوتها بقى عالي قوي (للأسف) و منها يستخدموه وقت اللزوم!

    الخلاصة ..كل واحد حر .. و كل واحد له رب يحاسبه .. حالنا يتصلح لما تترك الأمور الشخصية لكل شخص و هو و صلاحة و تقاه .. لكن تدخل العباد بهذه الطريقة في خصوصيات كل بني آدم ..حاجة في منتهى السخف بصراحة .

  5. يا عزيزي المسألة ليست بعدد مدمني الإباحية على النت، وعدد متعاطي المخدرات، وإنما المبدأ واحد.
    فالمنع القانوني، والتجريم لفعل يضر الفرد والمجتمع هو واجب على السلطة.

    النقطة الثانية، لماذا يظل عبود الزمر والريان وغيرهم في السجن برغم صدور العديد من الأحكام القضائية بالإفراج عنهم؟ صحيح أن الحكومة تحاول أن تحصل على غطاء قانوني، ولكنها لا تعتمد عليه، فإذا توفر فبها وتعمت، وإلا فهي تفعل ما تشاء برغم أنف أحكام القضاء ونصوص القانون.
    ولو قامت الحكومة بحجب مواقع سياسية تحت دعوى أنها إباحية لكانت مخالفة للقانون. ومع ذلك فالحكومة تحجب (أو كانت تحجب) عددا من المواقع السياسية مثل جريدة الشعب، وإخوان أون لاين، ونافذة مصر، وجبهة إنقاذ مصر. وغيرها قبل صدور هذا الحكم. ولم تكن بحاجة إلى صدور هذا الحكم من أجل تنفيذ الحجب.
    الخلاصة، أنه إذا كان كل واحد حر، فهو مسؤول عن هذه الحرية. والإباحية على النت ليست خصوصوية، وإنما هي أمر بمس المجتمع ككل.

    تحياتي

  6. مرة أخرى هاتقولي يضر الفرد و المجتمع .. ما الضرر الواقع عليك من مدمني الاباحية؟
    ليس لأن الفعل حرام فهذا يعني انك تتضرر منه .. اذا كان هناك ضرر فانه يقع على المدمن نفسه و ليس عليك انت .. ليس المطلوب منك او من الحكومة هي تربية الناس ..! لماذا تتدخل الحكومة في سلوك شخصي لا يضر أحدا !! غريب جدا دي

    و بعدين من يهتم لأمر عبود الزمر و الريان .. ؟؟ واحد ارهابي و التاني حرامي .. لاحظ انك دائما تاتي بامثلة غريبة !! اذا كان أبو الفتوح بتاع الاخوان محدش مهتم بيه هايهتموا بالزمر الارهابي؟

    برده انت لم تجاوبني .. كيف تمس الاباحية المجتمع كله .. أرجوك خليك في هذه النقطة .. أصلها لو كانت هاتضر المجتمع فعلا كانت دول العالم من حولنا أصدرت 1000 تشريع لمنعه .. ! أنا لا أناقش رأي الدين أنا أناقش شخصا يقول ان الاباحية على الانترنت تضر المجتمع .. مع أن الكبت برده لم ينفع المجتمع !

  7. بدأت في اعتراضك على القرار بأنه ذريعة للحكومة بحجب المواقع المخالفة سياسياً. فظننت أن هذا ما يهمك. وهذا اعتراض ساقط، كما سبق بيانه.
    أما القضية الأخرى، وهي تأثير هذه المواقع على المجتمع،
    أي ضرر يقع على فرد يقع على المجتمع ككل.
    انتشار هذه المواقع يزيد من نسبة الجرائم الجنسية من تحرش واغتصاب وزنا.

    سماح دول العالم بشيء ليس حجة على ديننا، فدول العالم تبيح الدعارة، وبعضها يبيح المخدرات. ولا يعني ذلك أن علينا أن نقتدي بهم في ذلك. دول العالم تبيح اللواط، ولسنا مطالبين بالسماح به. وقس على ذلك ما تشاء.

    تحياتي

  8. كون أحدهم إرهابي أو لص أو بريء. لا يغير من أنه حصل على حكم قضائي بالإفراج عنه، ولم ينفذ هذا الحكم. إذن الحكومة لا تحترم أحكام القضاء. ولا تحتاج إليها في القبض على شخص أو حجب موقع.
    فالاعتراض على القرار القضائي خوفاً من استغلال الحكومة للحكم القضائي لحجب مواقع سياسية هو اعتراض ساقط لا محل له.

    تحياتي

  9. مش هانوصل لنقطة تلاقي ..ببساطة لأنك تقول كلام مرسل لا يستند الى أي دراسة او حقيقة علمية !!

    و مرة أخرى انا أنا لا أناقش احكاما دينية .. فالكلام هنا كثير و لكني اناقش المنطق و فلسفة الحجب لا أكثر.. لو قلت لي ان هذه ديكتاتورية و خلاص .. تريحني و نريح نفسك لكن تقوللي أصل هناك ضرر على المجتمع أقولك اثبت ذلك بكبلم علمي مدروس !!
    بلاش كلام مشايخ المنابر هذه الأيام اللي فاكرين نفسهم فاهمين في كل حاجة ..!
    مدمن الاباحية شخص ربما يكون مريضا و يحتاج الى علاج و لكن هذا لا يعني انه يضر المجتمع بأي شكل من الأشكال .. و انا قلتلك لو كان المنع سيخلق مجتمع لا اغتضاب فيه و لا تحرش أقولك حلو جدا .. و لكن مثال السعودية لا يحتاج الى توضيح .

    تحياتي و سعيد بجد بالحوار

  10. يعني انت ازاي شايف ان ادمان الإباحية ميضرش المجتمع؟
    طيب اي علم انت بتستند عليه في كلامك؟ تقدر تقولي حضرتك مثلا عندك احصائيات منين عن حالات الاغتصاب في السعودية اللي انت واخدها دايما مثال؟
    وبعدين انت اي حد يخالفك تروح تقوله سيبك من بتوع المنابر؟ هو حد جاب سيرة بتوع المنابر دلوقتي؟ ولا انت لما تتزنق تهجم على المشايخ والمنابر والوهابية والسعودية والسلفية وتتريق وتسفه وخلاص؟ هو دة بقة الأسلوب العلمي؟
    واتعلمته فين؟
    وبعدين يا سيد فيه فرق اني ادخل على النت الاقي اعلان عن موقع اباحي وادخله او الاقيه في الهيستوري (من استعمال واحد قبلي في كافيه مثلا) وبين اني ادور على برنامج بروكسي
    الفرق طبعا ان في ناس بتدمن الكلام دة بالصدفة بيتفتح قدامه مرة واتنين وبعد كدة يبدأ يدور عليه… يعني لو اتحجبت الفرصة هتقل لمدمني الاباحية بسبب الانترنت وهيفضل في ادمان اباحية بس للي ادمنها بسبب تاني زي صحبة السوء مثلا
    وبعدين يا سيد يا محترم ايه دخل الحكومة أصلا في الموضوع؟
    ما انت قلت بنفسك ان واحد رفع قضية يطالب بكدة يعني واحد من المجتمع استشعر خطر الكلام دة وراح رفع القضية
    والقضاء حكم بحجب المواقع
    فين الحكومة في الموضوع بقة؟
    ولا هتقولي بقة الحكومة مسلطاه عشان يلهي الناس والكلام اياه؟ مش دي بردو اسمها نظرية المؤامرة اللي انت طول عمرك رافضها؟

    اقولك بقة ايه دخل الحكومة في الموضوع:
    طبعا لو حضرتك هاجمت صاحب الدعوى والحكم القضائي والفكرة نفسها بدون ماتهاجم الحكومة الناس (او بعضهم على الاقل) هتقول عليك مناصر للاباحية ومناهض للاسلام والكلام دة. لكن لو كمان هاجمت الجكومة في نفس النقال بحجة كبت الحريات يبقى عندك ذريعة تكتب بسببها مقالك

    ممكن أنا بقة أسألك سؤال؟
    انت حجب المواقع الاباحية تاعبك في ايه؟

  11. انا معنديش احصائيات صح .. بس افتح كل يوم موقع العربية و اتفرج .. مع انني ممكن اعمل بحث و اطلع دراسات كثير في المجتمع السعودي .. الذي يدعي العفة و النقاء و الطهارة .. يعني المنع ما عملش حاجة .. و انت عايش هناك يا عم الشيخ و عارف اكثر مني !
    انا بقى نفسي اعرف مدمن هذه المواقع ضر المجتمع في ايه؟
    لو بيبيع افلام او غيره نقول ماشي .. لو بيعرضها للعامة او (بيجاهر بيها) نقول ممكن .. بس ده في بيته هو حر !

    و بعدين هي الحكومة = القضاء؟
    لو انت هاتقولي القضاء مستقل .. مش دائما خالص .. و الأحكام كثير ما تعدش .. يعني الحكم طلع من الحكومة بشكل او بآخر.

    بصفة عامة يا محمد .. انا مع الحرية الشخصية .. بالضبط زي موقفي من النقاب .. انا ضده على طول ..بس مع حق المنتقبات في ان يرتدينه .. حتى مع وجود وظائف تستدعي عدم النقاب بس ماااااااشي .. و مع وجود تحفظات على الامن و الأمان في الشارع بسبب النقاب بس ماااااشي .. حرية شخصية لا يجب ان تلمس من بعيد او قريب

    انا بقى الموضوع تاعبني في ايه ..:) هاقولك
    الواحد يعني يحب من حين لآخر يشوف فيلم هنا و لا هنا .. عيش و سيبني اعيش يا عم الحاج .. لأ بهزر 🙂 🙂

    اللي تعابني ان المنع لو دخل في الحتة دي ..يبقى كل يوم و التاني حاجة تتمنع .. موقع اباحي .. موقع سياسي .. موقع بيشتم في الريس و في عائلته الكريمة .. موقع ينشر الالحاد و الزندقة ….ألخ
    لأ لأ لأ .. كل واحد له رب يحاسبه .. اذا لم ياتي المنع من الشخص نفسه و من قناعته يبقى بلاه أحسن .. الراجل اللي عايز يتفرج هايلاقي ألف طريقة و طريقة .. هي مش مسألة ان الحكومة تنفض ايدها .. و برده للمرة المليون .. الحكومة مش بتاعت ربنا قوي علشان تعمل علينا هيئة أمر بالمعروف ..

    و منور و الله يا حاج 🙂

  12. بص يا حبيب قلبي
    فهمت من معنى كلامك ان الفرجة على الحاجات دي ليها سكك كتير مش بس النت يعني اللي مصمم على كدة مش هيغلب يبقى الحجب مضرش حد صح؟
    لكن عاوزك تقهم من كلامي اني قصدت ان النت مش بس وسيلة للفرجة لأ دة كمان باب لدخول لناس تانية في الموضوع هو مكانش في دماغها أصلا
    يعني لو حجبته ابقى قفلت باب من قبل ما يتفتح ودة هيفيد مش هيضر والوقاية خير من العلاج
    بالنسبة للنقاب ميصحش تقول على حاجة انك ضدها على طول وانت عارف ان دي حاجة كانت بتعملها زوجات النبي في حياته والنبي كان شايفها ومقرها
    وبعدين المسألة خلافية بين الصحابة في تفسيرهم للقرآن يبقى منجيش احنا بقة في مسألة خلافية ونتبنى رأي معين (بهوى ولي وبفقه) ونجبر الناس على اتباعه (اقصد الحكومة وشيخ الأزهر) صح ولا أنا غلطان؟
    وادعيلي مرة تانية

  13. وبالنسبة لموضوع انا عايش هناك وشايف
    شهادة حق أسأل عنها أمام الله
    هنا العفة والطهارة هي الغالبة في المجتمع وطالما انت استشهدت بيا يبقى تسمع كلامي وإلا هادبحك….. أكيد مش بهزر….. بهرج

  14. الله يكرمك بلاش نخش في سكة شرعية النقاب .. دي سكلها كلها لبش 🙂
    و بعدين يا راجل .. هم مين دول اللي مش في دماغهم؟؟ 🙂
    الناس كلها في دماغها .. و النفس أمارة بالسوء .. بس في واحد عارف الصح من الغلط .. مش لازم دايما يبقى في عسكري علشان يضربني على ايدي و يقوللي كخ كده عيب !
    أمال نتحاسب على ايه .. اذا كان ربنا ترك لنا حرية الايمان أو الكفر به ..!!

    بس انا برده ما بحبش السعوديين وماليش فيهم 🙂
    بس علشان انت عندهم يبقى ماشي يا عم .. خليها علينا

  15. أنا مدخلتش في سكة مشروعية النقاب عشان اقنعك بحاجة
    أنا بس كنت أقصد اسلوب التعامل مع القضايا الخلافية لازم يكون فيه احترام للرأي الآخر خصوصا لو كان رأي معتبر وله أدلته وكمان تبناه بعض الصحابة
    موضوع كخ وعيب انا قلتلك فيه اللي انا شايفه وواضح اننا مش هنوصل لحل بس على الاقل كل واحد فهم التاني اللي عنده من غير تعصب ولا اتهامات
    موضوع تحب او متحبش دي حاجة ترجعلك بس اول ما الي في قلبك يترجم لفعل او كلام او مقال منشور الناس تقراه يبقى انت خليته عرضة للمناقشة ولازم يترد عليه اذا حسينا فيه اتهام مش مزبوط او تعصب زايد والاختىف في الرأي لا يفسد للود قضية طالما الاختلاف دايما بأدب

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: