علمانية تركيا .. العيب فين ؟

لطالما ازعجني كثيرون في مصر من حديثهم عن العلمانية و الدولة المدنية و غيرها من المصطلحات الرائجة . و اذا تكلم هؤلاء أحسست أنني أعيش في أرقى ديموقراطيات العالم .. هذا حال بعض المطبلين و الذين ربما لا يفهمون ما هي العلمانية أصلا و لكن هذا الكلام  يرددونه لمجرد الكيد في الاخوان المسلمين مع ان رئيس الوزراء الدكتور نظيف  أكد على علمانية مصر وفي نفس الوقت  الخطاب العام للحزب الوطني لا يتفق مع هذه الرؤية فمصر دولة اسلامية في أوقات أخرى و لكل مقام مقال  .. هذا حالنا في مصر ودولة مثل السعودية لا تستطيع أن تدعي أنها دولة علمانية حيث أن العلمانية بكل أشكالها و انواعها و درجاتها تعتبر كفرا بواحا لدى مشايخ السلفية أو الوهابية بل دائما ما يتفاخر كثير من السعوديين أنها البلد الوحيد الذي يطبق الشريعة الاسلامية (ربما في الذبح و الجلد فقط)  .. الدولتان لم تستطع واحدة منهما ان تقف عشر الموقف الذي وقفته تركيا و ما زالت تقفه برئيس وزرائها العظيم أردوجان .. الرجل  الذي أكد مليون ألف مرة و حلف مليار يمين ان تركيا بلد علمانية و ليست له أية خطط لتغيير هذه الطبيعة .. و لكنه لم يستح ان يقول أن اسرائيل تتحمل المسؤولية كاملة عما يحدث في غزة و ليس كأصحاب اللحى و العمائم الذين ما صدقوا و نزلوا شتيمة في ايران و حماس و حزب الله .. يا تري  العيب فين ؟

Advertisements

7 تعليقات

  1. السلام عليكم ورحمة الله وبركاته
    بجد اسلوبك مستفز ولا تفقه اى شىء اقسم بالله اصغر عيل يفند كلامك
    وحسبنا الله ونعم الوكيل فى اعداء السلفية الحقة التى ترجع للسلف الصالح

  2. هو ليه اخواننا الوهابيين دائما يقولوا ان أصغر طفل ممكن يفند كلام الآخرين؟ و دائما يقولك .. أصله جاهل جهل مركب .. هههه و الله بجد كلام غريب .. بطلوا ترديد لكلام السعوديين بقى و خلي عندكم شوية انتماء .. و لا فلوس البترول و الغترة و العقال عموكم ؟؟

    انا سعيد ان اسلوبي مستفز لحضرتك فهذا يعني أنه أتى على الجرح .. لمعلوماتك .. كاتب هذه السكور قضى سنينا في الفكر الوهابي المسمى سلفي و الحمد لله الذي أرانا الحق .

    رمضان كريم يا مولانا .

  3. سؤال يا فتحي:
    انت ليه بتستعمل كلمة وهابي؟ ولي مصر على تصنيف اللي مش على مزاجك لانه وهابي؟ ولما حضرتك يا محترم قضيت سنين (ولو انها مش سنين ولا حاجة دي هي سنة عامية وبدأت بعدها تتحول وانت عارف كويس انك حالك في السنة دي كان احسن بكتير من السنين اللي قبلها والفضل بعد ربنا كان للناس اللي انت بتتريق عليهم دلوقتي)في الفكر الوهابي المسمى سلفي أكيد حضرتك عرفت من الناس دي ناس كتير واكيد شفت تعاملاتهم واخلاقهم (وانا عندي امثلة يا نتو) ليه مصر دايما تسفه طريقتهم وتفكيرهم؟ وليه شايل السعودية فوق دماغك وزاعق؟
    أولا انت تعرفني كويس وانا والحمد لله سلفي ممكن من فضلك متقولش علي وهابي؟ عشان دة بيضايقني؟ ممكن تنسبني للاسلام وبس؟ ولا دة كمان مش من حقوق المسلم على المسلم؟
    ممكن حضرتك بقة تفهمنا ايه هي العلمانية؟
    سؤال كمان: أنا أحسب ان زوجتك محجبة تحب ان زوجتك لو في يوم من الأيام بقت عضوة في البرلمان انها تتمنع من دخوله بالحجاب؟ مش هو دة اللي بيحصل في تركيا؟

    أما عن كلامك عن الرئيس العظيم (وأنا أعنيها) رجب طيب أردوجان فهو من التيار الإسلامي في تركيا وإن كان مضطر يقسم باللي انت قلته فوق فدة عشان عاوز ياخد فرصة يطور للأحسن مش معناه انه مقتنع بكدة
    يعني تركيا طلع منها الموقف دة لما مسكها واحد اسلامي يا سيد

    على كل حال ربنا يهديني ويهديك

  4. سؤال يا فتحي:
    انت ليه بتستعمل كلمة وهابي؟ ولي مصر على تصنيف اللي مش على مزاجك لانه وهابي؟ ولما حضرتك يا محترم قضيت سنين (ولو انها مش سنين ولا حاجة دي هي سنة عامية وبدأت بعدها تتحول وانت عارف كويس انك حالك في السنة دي كان احسن بكتير من السنين اللي قبلها والفضل بعد ربنا كان للناس اللي انت بتتريق عليهم دلوقتي)في الفكر الوهابي المسمى سلفي أكيد حضرتك عرفت من الناس دي ناس كتير واكيد شفت تعاملاتهم واخلاقهم (وانا عندي امثلة يا نتو) ليه مصر دايما تسفه طريقتهم وتفكيرهم؟ وليه شايل السعودية فوق دماغك وزاعق؟
    أولا انت تعرفني كويس وانا والحمد لله سلفي ممكن من فضلك متقولش علي وهابي؟ عشان دة بيضايقني؟ ممكن تنسبني للاسلام وبس؟ ولا دة كمان مش من حقوق المسلم على المسلم؟
    ممكن حضرتك بقة تفهمنا ايه هي العلمانية؟
    سؤال كمان: أنا أحسب ان زوجتك محجبة تحب ان زوجتك لو في يوم من الأيام بقت عضوة في البرلمان انها تتمنع من دخوله بالحجاب؟ مش هو دة اللي بيحصل في تركيا؟

    أما عن كلامك عن الرئيس العظيم (وأنا أعنيها) رجب طيب أردوجان فهو من التيار الإسلامي في تركيا وإن كان مضطر يقسم باللي انت قلته فوق فدة عشان عاوز ياخد فرصة يطور للأحسن مش معناه انه مقتنع بكدة
    يعني تركيا طلع منها الموقف دة لما مسكها واحد اسلامي يا سيد
    وبمناسبة الغترة والعقال والفلوس:
    ممكن تقولي مين من اصحابك اللي خدو بايدك ودخلوك في الفكر اللي بتقول عليه وهابي كان عاش في السعودية ؟ ولا شاف فلوسها؟ ولا هو كلام وخلاص؟

    على كل حال ربنا يهديني ويهديك

  5. واحدة واحدة بقى علشان انت كده فتحت مليون موضوع

    1- السنة او الشهر اللي قضيتوهم كان تجربة .. لها ايجابيات أقلها انني بقيت باصلي الفروض على الأقل و الحمد لله .. و لها سلبيات كثيرة أيضا.. و انا ذكرته حتى لا يقال و انت ايش عرفك بالناس دي أو بالفكر ده أو ان أرمى بالجهل كالمعتاد و هذا لا يعني انني عالم او حتى شبه عالم!

    2- مش عارف ليه انت زعلان من كلمة وهابي ؟؟ و السلفيين بيزعلوا جدا منها و انا مش فاهم ليه ؟؟ ألا تسمى الدعوة الوهابية ؟ الحركة الوهابية نسبة الى محمد بن عبد الوهاب؟ انا ذكرتها بلفظ السلفية او الوهابية علشان نبقى محددين .. كل الناس تدعي السلفية . الاخوان و التبليغ و حتى الصوفية ..صح ؟
    اسميهم أهل الحديث او اهل الأثر؟
    ليه اللفظ يعتبر اهانة ؟ يعني الحنابلة او الشافعية أو غيرهم من أتباع المذاهب لازم يزعلوا هم كمان ؟
    بس لو زعلان يا سيدي .. أنا آسف.. انت زعلك بجد يعز علي و الله .

    3- الموضوع في الأساس كان الغرض منه ان البعض يرى أن العلمانية شر مطلق لا خير فيه .. مع ان الموقف التركي هو وليد العلمانية .. اردوغان لم يقف وي قول اننا نفعل هذا من أجل الاسلام .. بينما الدول الاسلامية (نظريا على الأقل) تحيزت لاسرائيل و منها مصر و السعودية ؟؟
    الناس تنتخب أردوغان لأنه عمل فرق في حياتهم .. مش علشان شعاراته .. في كثير من أنصار ارودغان غير محجبات و ناس يمكن ما بتصليش بس هم حسسوا الفرق في الحياة و العيشة مش شعارات .. الرجل دينه لنفسه و ليس للشعب .. ( و اما ما ينفع الناس فيمكث في الأرض )

    4 – أردوغان سواء كان اسلاميا في باطنه .. او اسلاميا بحكم خلفيته .. فهو نفى عن نفسه هذا .. و الرجل يحترم في نقطة انه احتفظ بقناعاته الشخصية لنفسه و لم يفرضها .. نعم الرجل يريد ان تفتح الحريات في تركيا و لكن مش بالعافية و بالجبر .. بناته محجبات يرسلهن للدراسة في امريكا حتى تتغير الظروف .. و تغييرها يكون بصناديق الاقتراع و بالسياسة و الحنكة و ليست بهئية أمر بالمعروف !!
    انا زوجتي محجبة و الحمد لله و لو انا في وضع مماثل .. لو مش عاجبني يبقى بلاها .. مش هاروح أفجر نفسي ؟!
    انا يمكن لي تحفظات كثيرة على الحريات العامة في تركيا بس باموت في مواقف الحكومة التركية من حيث السياسة و العقلانية و فصل السياسي عن الديني .. علشان اختلاط الاثنين بيودي في ستين داهية ..

    5- اصحابي اللي ليهم فضل علي و خدوا بيدي لم يسافروا السعودية باجسادهم .. و لكن عقولهم كانت هناك .. يعني لما نحب نعرف راي حد ثقيل هانشوف رأي مين ؟ مش ابن باز و ابن عثيمين ؟؟ لما نحب نفسهم حاجة نقول فلان تتلمذ على يد الشيخ فلان بن فلان في السعودية .. يبقى السعودية أثرت فينا و لا ل يا عم الحاج؟
    لما في ناس في مصر تصوم لصيام السعودية و تفطر لفكرها ..يبقى ايه ؟
    لما في ناس في مصر اذا لم تكن الفتوى من هيئة كبار العلماء تبقى فشنك .. ليه ؟؟ مع ان الهيئة زي الأزهر بالضبط .. تعيين المشايخ في الهيئة يمر على الملك .. و الملك له أن يعين او أن يقيل ( و لسه من كام اسبوع قام الملك باعفاء شيخ علشان انتقد الاختلاط في جامعة الملك عبد الله الجديدة ) .. و الأزهر كذلك يعين شيخه و يقال بجرة قلم من الريس الكبير أو حد من عياله كمان !!!!!!!!
    ليه مشايخ مصر يلبسوا غترة .. و يتكلموا بنفس طريقة مشايخ الخليج ؟؟؟؟ ليه ؟؟؟؟
    يا محمد في ناس في الخليج بتصرف على نشر الدعوة السلفية في مصر .. يبقى في فلوس و لا لأ ؟؟
    يعني انت عايز تفهمني ان كتاب لابن العثيمين طبعة فاخرة 500 صفحة بالألوان يبقى ب 25 جنيه و كتاب 120 صفحة للشيخ الغزالي يبقى بأغلى من كده ؟؟
    مش في طلبة علم في مصر يتبناهم ناس علشان يتفرغوا للعلم الشرعي؟؟
    ليه المشايخ يسموا نفسهم محمد بن حسين بن يعقوب .. مش هم بيسموا نفسهم كده في الخليج .. أبوس ايدك .. ابوس ايدك يا شيخ لا تقل أن هذه سنة !!

    عارف و الله .. لو السلفيين يبقوا زيك في حوارهم يا محمد كان مصر و الله حالها اتغير ..

    منور و الله يا برنس 🙂

  6. شوف يا جميل :
    1- موضوع انك قعدت سنة أو شهر أو غيره كان بس مجرد ملحوظة عابرة مش المقصود المدة لكن المقصود انك اختلطت بالناس دي وعرفت منهم مجموعة كويسة وعارف انهم ناس محترمة سؤالي كان ليه بتسفه طريقة تفكيرهم؟ وليه شايل السعودية فوق دماغك وزاعق؟ . وكمان ليه بتحاول توحي انهم على ضلال (راجع فقرة…. الحمد لله الذي هدانا للحق)
    2- انا ليه زعلان من كلمة وهابي:
    أولا : لأني شايف ان الامام محمد بن عبد الوهاب مجاش بحاجة جديدة في الدين من دماغه لكن كان بينادي بالرجوع للدين الصحيح يعني لو أنا استجبت لدعوته ابقى متدين أو إسلامي أو سني (نسبة لسنة النبي صلى الله عليه وسلم) لكن إطلاق لفظ وهابي بيوحي للناس ان الراجل دة له فكر وابتداع تاني هو اللي ابتكره محدش قاله قبله وبالتالي الناس تفكره فرقة ضالة او شاذة
    ثانيا:كلمة وهابية دلوقتي بقى ليها معنى سياسي او ثقافي سياسي مقصود من وراه الغزو الثقافي المنظم من قبل السعودية والمستهدف منه مصر
    طبعا انا لا شايف اني فيه غزو ثقافي ولا سياسي ولا اي كلام من المجعلص دة
    انا شايف ببساطة ان الناس لما بتتكلم وتقول فكرها ومعتقدها فهي حرة في الدعوة اليه طالما ان اللي بيتبعهم بيتبعهم بمزاجه وباقتناع منه يبقى الموضوع مش مستاهل الصورة اللي بتوحي بها الكلمة

    أما بالنسبة لموضوع حنبلي وشافعي فهو مختلف ببساطة الناس دي بتتكلم في الفقه أو بالأحرى أصول الفقه وكل واحد اجتهد يحط أصول وقواعد للفقه عشان الناس تعرف الحرام من الحلال. وكون الواحد ينتسب لمذهب منهم معناه انه دارس وفاهم القواعد والأصول دي وبياخد بيها لكن مش معناه انه بيتبع كلام أهل المذهب ورأيهم في كل المسائل الفقهية دة حتى يا أخي الإمام الشافعي نفسه كان بيبقى له أكتر من رأي في المسألة الواحدة (أيام مصر غير أيام بغداد) والإمام أحمد تسمع دايما كلمة ” … وهذا الرأي أخذ به فلان وفلان وفلان وإحدى الروايات عن أحمد بن حنبل” يعني فيه روايات تانية عنه برأي مختلف. ودة مافيهوش مشكلة
    لكن المشكلة انك لما تقول وهابي بتوحي انه مذهب عقدي مش فقهي

    3- بالنسبة للموقف التركي فهو ليس وليد العلمانية ولكن وليد الإنسانية وأي شخص عادي مش بس حاكم عنده ذرة إحساس كان هيقف موقف زي دة أو على الأقل هيحس بكدة من جواه. وبعدين اللي شايفين العلمانية شر مطلق لا خير فيه معذورين لأن تاريخها في تركية كان في صورة حرب لكل ما هو إسلامي. وعامة أنا مش عاوز أحول الحوار لسياسة لأني مش بفهم فيها ومش بحبها

    4- تاني انا مش هتكلم في السياسة . محدش قال ابدا ان الموضوع بالجبر “من شاء فليؤمن ومن شاء فليكفر” بس كمان الموضوع ميبقاش بالعكس انهم هم اللي يجبروا الواحدة على خلع حجابها مش دي بردو حرية شخصية واعتقادية؟
    أنا موضوع فصل الدين عن السياسة فأنا أختلف معاك فيه من حيث المبدأ. متقعدش بقة تقولي يعني السعودية اللي بنقول انها بتحكم بالشرع عملت ايه؟ ببساطة الإسلام حجة على السعودية وعلى الناس جميعا مش السعودية هي اللي حجة على الإسلام. يعني ببساطة مش معنى ان الحاكم بدعي تطبيق الشرع وهو في الآخر بيعمل اللي على هواه يبقى الشرع اللي كخة لأ الحاكم هو اللي غلطان
    كل ما في الأمر ان مفيش نموذج في عصرنا الحاضر للأسف ممكن تقول عليه بيحكم بشرع الله بصورة سليمة والسبب بسيط ان الحكم مش خالص لوجه الله ولنفع المسلمين لكن المواقف مبنية على المصالح السياسية والشخصية أكتر من انها مبنية على الشرع.
    الدين (أقصد الإسلام تحديدا) لو خدنا سياستنا(مش بس سياستنا وكمان أخلاقنا وتعاملاتنا) منه هنبقى أسبق الأمم وأكثرها تقدما. والأمر عليه مثال حي واقرا كتب التاريخ. وبعدين يا أخي لو ربنا مش عاوز الأرض تتحكم بشرعه يبقى النصوص السياسية في الكتاب والسنة نعمل فيها ايه؟ ندخلها أرشيف؟ ولا نقول انها متصلحش لزماننا؟
    انا بقة ليا ملحوظة : لما يكون نظام الدولة ودستورها وقوانينها بتقول “يحكم شرع الله في كل الأمور والمسائل” فدة في حد ذاته أفضل من انها تكون ” نعمل اللي على مزاجنا” حتى لو التطبيق غلط. لأن المبدأ لو صحيح والتطبيق غلط أفضل بكتير انه يكون المبدأ غلط. لأن دايما فيه فرصة ان حد ييجي يطبق صح وتغيير النظام السياسي بالكامل أصعب من تطوير وتحسين التطبيق للنظام القائم. (شفت انا مبتكلمش في السياسة ازاي؟)
    بالنسبة لهيئة الأمر فدي ببساطة طايفة مكلفة من ولي الأمر بمنع انتشار “المجاهرة بالمعصية” (ولتكن منكم أمة يأمرون بالمعروف وينهون عن المنكر) ولاحظ كلمة أمة هنا يعني دة غير الأمر العام لجميع المسلمين
    5- أنا كنت برد على كلمة “فلوس” البترول والغترة والعقال تحديدا مش حاجة تانية
    مفيش فلوس عمتنا والحمد لله. بس الجملة اللي انت كتبتها ردا على الأخ صاحب التعليق بتوحي ان دفاعه كان عن السعودية لسبب مادي انه غرقان في فلوسها فحبيت أبين ان في ناس بتدافع عن المنهج نفسه لاقتناعها بيه وعشان كدة ضربتلك المثل باصحابنا اللي نعرفهم كويس لأن كلامك فيه اتهام بعدم الانتماء ودي تهمة مش سهلة تتقال ببساطة كدة
    والحمد لله ردك أيد كلامي (ولكن عقولهم كانت هناك) يعني الموضوع موضوع عقل واقتناع مش فلوس وبترول.
    بالنسبة للأزهر وهيئة كبار العلماء مش معنى ان الموضوع بالتعيين ان كلهم نرميهم على جنب ونقول دول مغرضين. كل مكان فيه وفيه. والواحد طالما هو زيي وزيك كدة (ميح في العلوم الشرعية) يبقى له أنه يقلد أهل العلم اللي هو بيرتاح ليهم ودة مش عيب. أنا هديلك أمثلة من مصر عشان تعرف ان القصة مش مصر والسعودية لأ القصة قصة الحق أيا كان دولته. تقدر تقولي الشيخ الدكتور نصر فريد واصل تتلمذ على ايد مين في السعودية؟ ولا الشيخ عطية صقر عليه رحمة الله؟ ولا الشيخ الدكتور عبد الله عبد الحميد؟ ولا الدكتور عبد المهدي عبد القادر عبد الهادي؟ اسأل أي سلفي مصري عن الأسماء دي هيقولك ابصم على كلامهم بالعشرة مع انهم مش من الهيئة ولا اتعلموا على ايد حد من السعودية.
    بالنسبة لموضوع بيفطر على فطر السعودية أو يصوم على صومها فأولا وقبل كل شيء أنا أرفضه تماما واتبع فيه فتوى الشيخ الألباني عليه رحمة الله (على الفكرة الشيخ برغم انه يرى فقهيا توحيد الرؤية والمطالع يعني بلد تشوف الهلال الكل يصوم برغم كدة افتى بعدم جواز مخالفة أهل البلد أو ولي الأمر بحجة توحيد المطالع في حالة ان البلد تأخذ بالرأي الآخر وهو اختلاف المطالع).
    لكن أحب أقولك ان الموضوع لا هو فقهي ولا غيره ببساطة فيا أزمة ثقة بين الناس اللي بتعمل كدة والحكومة ومعظمهم خايفين تكون الحكومة لا بتشوف الهلال ولا يحزنون لكن بتخالف السعودية وبس لدواعي سياسية عشان كدة بتبعوا السعودية. لكن شهادة حق انا مشفتش حد من اللي بيعمل كدة بيعلن عن فطره او صومه أو بيدعو الناس تعمل زيه. وبعدين تعالى هنا انت يعني معترض عن اللي بيعمل كدة بينه وبين نفسه بسبب انا ذكرته فوق وتصرفه وان كان غلط بس سببه حرصه على صيامه وفطره ومش معترض على اللي بيجاهر بالفطر في نهار رمضان بدون عذر ؟ وزعلان ان الداخلية بتمسكهم؟
    بالنسبة للغترة فأنا مقابلتش حد بيقول انها من السنة لكن العمامة من السنة
    بالنسبة لطريقة الكلام فهي اللغة العربية مش شايف وجه اعتراض عليها ومش كلهم على فكرة بيتكلمو كدة . وبالنسبة للصرف على الدعوة فهو من وجهة نظري شيء كويس مش وحش طالما بتدعو إلى الله (على الأقل انك مقتنع بكدة) والصرف دة مش في مصر بس الناس بتصرف غلى الدعوة في الدنيا كلها ودة مش عيب ولا حرام
    وبردو كفالة طالب العلم الشرعي مش شيئ عيب لأن للأسف يا أحمد مبقاش فيه قاعدة عندها علم شرعي بالعدد المطلوب للأمة دي كلها
    بالنسبة لموضوع “بن” فهي مش سنة ولا حاجة بس دة الصحيح من ناحية اللغة العربية ودي عادة العرب ولسانهم من زمان وكوني اعتز باللغة العربية دة شيء بردو كويس.
    وموضوع اسعار الكتب دة عرض وطلب وكمية توزيع وغيره مش بس دعم مادي واللي بيقدر العلم مش هيستخسر يدفع والنت موجود

    ولأخيرا معلش اذا كان كلامي ناشف معاك شوية دة بس من عشمي وحبي فيك ادعيلي بقة احج السنة دي وان شاء الله ادعيلك على عرفة

  7. ما حنا مش هانوصل لحل في الوسط .. 🙂
    يا محمد انت لو السلفيين زيك كانت مشاكلي معاهم اتحلت .. بس تقول ايه بقى .. خير ان شاء الله

    يا عم روح حج الله يسهلك و يبارك لك و يكتبها لنا 🙂 🙂

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: